|
ANAANAT A/S
Taaguuteqqaarisaa: CASA MATRIZ
Isiginnaartitsissusiortoq: Diana Raznovich.
Ilitsersuisoq: Patti Shaughnessy
Scenografi: Camilla Nielsen
Isiginnaartitsisartut: Else Danielsen – Makka Kleist.
Diana Raznovich tassaavoq Argentinami arnani isiginnaartitsissusiortartut titartakkiortartullu taqassisitsiniarnerpaallunilu quinarnerpaat ilagisaat. Juutiusutut angutinik arnanillu atoqateqartartutut arnaalluni inuiaqatigiinnik isornartorsiuisartuunermigut Argentinami sakkutuut pissaanermik tigusinerat (1976-1983) sioqqullugu ukiup siuliani arlaleriarluni inuunermigut aarlerisaarneqartarpoq, tamatuma kingornatigut nunamut allamut nuulluni ukiorpassuarni najugaqarluni.
"Casa Matriz"-imi (1991-imeersumi) Gloriap anaanaq taartissaq attartorpaa, taanna tassaalluni inuuniutigalugu isiginnaartitsisartoq, arlalinnik anaanaasuusaartaqattaartoq, ilisarsisumit "anaanaq naalliuuteqartumit" anaanartut niuertoorpalaartutut nillertumik uummatilittut, panini eqqarsaatiginagu nunarsuaq tamaat angalaffigisaqattaarlugu. Anaanatut ilutsit ataasiakkaat tamarmik aamma "panittut" ilutsimik nutaamik pilersitsisaqattaarput. Inuiaqatigiinni sunik tamanik tunisaqarlunilu pisiaqarfiusinnaasumi Diana Raznovichip takutippai inoqatigiiffinni avatangiisit uagutsinnik inuusunik qanoq sunniuteqartarnerinik, eqqarsalersitsisumik, aammattaarli quianartumik.
Inuiaqatigiinni ataasiinnarmit pissaaneqarfiusuni ilinniarluarsimasutulli allarpassuartuulli Diana Raznovichip quiasaarinninneq qungujussaqanngitsunut sakkutut atorsimavaa. Oqarpoq: "Kamannermut naleqqiullugu illartitsinikkut annertunerujussuarmik oqariartuuteqarsinnaavutit."
Takutinneqaqqaarfia: 19. januar Sisimiuni Taseralimmi.
Kikkunnut: 15-nit ukiulinnit tulluussagaavoq
---ooOoo---
ACADEMYMUT NALUNAARUT
Ukiormanna isiginnaartitsissut soqutigineqartuartoq
Taaguuteqqaarisaa: Ein Bericht für eine Akademie
Atuakkiortoq: Franz Kafka.
Ilitsersuisoq: Svenn B. Syrin
Isiginnaartitsisartoq: Rassi Thygesen
Academymut Nalunaarut tassaavoq Kafkap oqaluttuaaraliaasa imaluunniit "short story"-liaasa ilaat. Taanna 1917-imi allallugulu atuagassiami "Der Jude"-mi saqqummersippaa. Oqaluttuarivaa aapakaaq "Røde Peter" ("Piitaq Aappaluk"), inunganerulerniarlunilu ilungersuutai. Afrikami orpippassuarni Piitaq Aappaluk qaqortunik amilinnik pisarineqarami karsimut paarnaarussaavoq, umiarsuarmillu tingerlaatilimmik Europaliaanneqarluni. Tigusaaqqanerminit aniguinissaq Piitap Aappaluup kissaatiginerpaavaa, taamaaliorniarlunilu umiartortut oqaasii periusaalu issuartaqattaalerpai. Europamut anngulluareerami Piitaq Aappaluk tupigusutsitsiuarpoq, ilinniartitsisoqarluarlunilu ilinniarfissuarmut akademiimut masterinngornissaminut nalunaarusiatut suliani saqqummiuppaa. Piitaq Aappaluk kiffaanngissuseqarnermik asannittuuvoq, naleqqussanngikkuni qularutissaanngitsumik uumasunik katersugaasivimmut Zoologisk Havemut pinngitsoornaviarani, imaluunniit cirkusimi aliikkusersuisarfimmi "music hall"-imi alutorsaatissatut piunnarluni. Kafkap allaaserisaa pillugu arlalinnik soqutiginartunik misissueqqissaaruteqartoqarsimavoq. Ilaat isumaqarpoq oqaluttuaq juutit Europami kulturimut akulerussuunnerannut tunngasoq, alla isumaqarluni kinaassutsip taamaatiinnarnissaanik imaluunniit "puiguinnarnissaanik" aarleqquttaaffianut tunngasoq.
Takutinneqaqqaarfia: 19. januar Sisimiuni Taseralimmi.
Kikkunnut: 15-nit ukiulinniit tulluussagaavoq
|
