1984-ip aasaagaa Tuukkaq Teater-imi ilinniartuusimasut katersuupput pilersillugulu isiginnaartitseqatigiit imminut pigisut Silamiut.

A allartinnermi Silamiut ukunannga inuttaqarpoq: Pisortaq Mooqqu Løvstrøm, teknikeri isiginnaartitsisartorlu Ilannguaq Kleist, isiginnaartitsisartut: Bendo Schmidt, Naja Rosing Olsen, Agga Olsen Dam, Anda Kristiansen, Qisunnguaq Alaufesen kiisalu Rasmus Lyberth.

Isiginnaartitsisartoqatigiit Silamiut 1985-imiit 2006-imut Namminersornerullutik Oqartussanit ingerlatsinermut tapiiffigineqartarsimapput. 2006-imi ingerlatsinermut tapiissut ukiumut 900.000 kr-niusimapput. 2007-imiit aallartittumik Namminersornerullutik Oqartussat Siamiunut suliniutinut aalajangersimasunut isumaqatigiissusiortalerput (servicekontrakt), maannakkumuugallartoq ukiut ataasiakkaarlugit, tassani qulakkeerniarneqarluni Silamiut siunissami ingerlatsiinnnarnissaa ataavartumillu ineriartornissaa anguniarlugu.

2006-imiilli Silamiut sulianik aalajangersimasunik suliaqarfiuvoq, tassa aalajangersimasunik sulisoqanngilaq, sulialli ataasiakkaat aallaavigalugit ingerlalluni.

Sulianut aalajangersimasunut aningaasaateqarfinnut assigiinngitsunut qinnuteqarnikkut aningaasalersorneqarput.

Silamiut aqutsisui tassaapput Svenn B. Syrin, isiginnaagassiornermi pisortaq kiisalu Ebbe Mortensen, allaffissornikkut pisortaq.

Silamiut aalajangersimasumik angerlarsimaffeqaatigaluni ujartuisuuvoq, nunatsinni angalaarluni isiginnaartitsisarnermi saniatigut Europa tamangajaat angalaarfiginikuullugu, Canada-mi, Alaska-mi Australiamilu. Silamiut meeqqanut isiginnaagassiornikuuvoq, Juullimut ammartakkat KNR suleqatigalugu, pisut aallaavigalugit quiasaarusiat (satiriske), inersimasunut isiginnaagassiat, paasititsiniaanerit soorluttaaq sulisut assigiinngitsunik workshop-ertitsisartut, pissanganartunik isiginnaartitsinermik atuartitsinerit pikkorissartitsisarnerillu. Silamiut nipilersugakkanik CD-inngorlugit, Video-nngorlugit DVD-inngorlugillu arlalinnik saqqummersitsinikuuvoq.